Фарзана Абдилашимова: «БААУ бүгүнкү күндөгү менин калыптанышымда чечүүчү роль ойноду»

13 января 2023

Фарзана Абдилашимова 2019-жылы БААУнун Социология бөлүмүн аяктаган. Окууну бүтүргөндөн кийин, академиялык жолун улантып, Борбордук Европа университетинде магистратурага тапшырып, учурда БУУнун аялдар үчүн программасынын Кыргызстандагы "Spotlight Initiative" программасында долбоор боюнча адис болуп иштейт. Бул маекте Фарзана БААУдагы эң жакшы учурларын жана карьера жолундагы тажрыйбасын бөлүшөт.

«Менин студенттик жылдарым жашоомдогу эң сонун учурлар болду, абдан көп мүмкүнчүлүктөргө бай эле. БААУ мага сынчыл ой жүгүртүү, кесиптик өсүшкө жана кыялдарга жол ачкан гана эмес, ошондой эле бүгүнкү күндөгү өзүмдүн калыптанышымда чечүүчү роль ойноду. Ар бир жыл кызыктуу учурларга жана академиялык жетишкендиктерге бай болчу.

Окуу учурунда эң жакын досторумду таптым, алар бүгүнкү күндө дагы жашоомдо бар. Бул нерсени «өмүрлүк достук» деп атайм — жан дилиңди түшүнгөн адамдардын жанында болуу керемет сезим. Университетиме мунун баары үчүн абдан ыраазымын.

БААУ ар бир студент үчүн эң сонун, ийгиликтүү жеке өсүүгө жана ар кандай кошумча иш-чараларга ылайыктуу шарттарды түзгөнү үчүн өтө ыраазымын. БААУда окуган төрт жыл ичинде төмөнкү иш-чараларга активдүү катыштым:

“Rotaract” кайрымдуулук клубу
“Mirrors” театры (биринчи курсумда)
БААУ Китеп клубу
Карьера элчиси жана Академиялык кеңеш берүү офисинин уюштурган бардык иш-чаралары
“WARC” борборунда окутуучулук

БААУну бүткөндөн кийин, Венадан Борбордук Европа университетине тапшырып, Гендердик изилдөөлөр боюнча магистрдик даражаны алдым. Бул дагы унутулгус тажрыйба болду, ал мага баалуу билим алуу менен бирге гендердик изилдөөлөр жана Европадагы адам укуктары боюнча изилдөө борборлорунда иштеп, стажировкадан өтүүгө мүмкүнчүлүк берди.

Азыркы учурда Кыргызстандагы БУУнун аялдар программасынын "Spotlight Initiative" программасында долбоор боюнча адис болуп иштейм. Spotlight Initiative — бул кыздарга жана аялдарга карата зомбулукту жоюуга багытталган көп жылдык глобалдык демилге, аны Бириккен Улуттар Уюму жана Европа Биримдиги Кыргызстанда ишке ашырып жатат. Мен долбоордун аналитикалык отчеттору жана башка тиешелүү иш-чараларын жүргүзүү, ишке ашыруучу өнөктөштөр менен тыгыз байланышта иштешип, долбоордун эффективдүү башкарылышына колдоо көрсөтөм. Ошондой эле, программа дизайны, ишке ашыруу, баалоо сыяктуу процесстерге активдүү катышып, программа менен иштөө тобу, БУУнун штаб-квартирасы, өкмөт өкүлдөрү, донорлор жана жарандык коом менен тыгыз кызматташам.

Келечектеги максаттарым жана кыялдарым, албетте, аялдардын укуктары жана мүмкүнчүлүктөрүн кеңейтүү тармагына байланыштуу. Бул багытты жүрөгүмдүн тандоосу менен тандап, окууну бүткөндөн бери (болбосо андан да мурун) аны жолдоп келе жатам. Ар бир күндүк ишимден, өзүмдүн жана кесиптештеримдин жетишкендиктеринен, өнөктөштөрдүн ийгиликтеринен улам шыктанып келем — эң кичине жетишкендиктер да мени мындан ары түртөт. Гендердик теңдикти жана бардык адамдар, анын ичинде аялдар, кыздар, азчылыктар жана коомдон четтетилген топтор үчүн бирдей укуктарды жана мүмкүнчүлүктөрдү колдоо маанилүү деп эсептейм. Бул багытта жасалган ар бир аракет жана иш-аракет чоң өзгөрүүлөргө алып келет. Эгерде ар бир адам гендердик теңдиктин маанилүүлүгүн түшүнүп, аны жайылтууда демөөрчү болсо, биз зомбулуксуз, теңсиздиксиз жана четтетилбеген жашоого жетебиз. Азыркы аракеттерим жана кесиптик жолум баарыбыз үчүн коопсуз жана тең укуктуу дүйнө түзүүгө салым кошот деп ишенем.

БААУ студенттерине кеңешим — ар дайым ички үнүңүзгө кулак салып, кыялдарыңызды жолдоңуз. Эгер максатыңыз болсо, аны ишке ашыруу үчүн болгон күчүңүздү жумшаңыз жана тышкы факторлорго алаксыбаңыз. Акылыңызды өнүктүрүп, эмоционалдык интеллектти өрчүтүп, келечектеги карьераңызга жана өсүшүңүзгө пайдалуу болуучу бардык иш-чараларга катышыңыз. Өзүңүздүн эмнеге жөндөмдүү экениңизди сиз гана билесиз. Күнүңүздүн аягында сизди бактылуу кыла турган кесипти жүрөгүңүздүн каалоосу менен тандаңыз.»